|
‘Ppe i gienti de ‘u paise ‘ssa
scaliddra,
ca và da ‘u barru a la vianova ‘e sutta,
eni a re vote beddra e a re vote brutta.
Eni beddra a ‘cchine, dopu tanti iurni
c’ani passatu chi lu sape addrue,
pue se ricoglie, stancatu ‘e stà luntanu
de chine voni bene
e ca, ‘ccu curpa o menu,
cianciennu ‘na matina ani lassatu.
All’uocchj ‘e ‘ssu cuntientu la
Scaliddra
mò pare cumu ‘rroba ‘e l’atru munnu;
scaluni ‘e uoru, sutta ‘u cielu azzurru,
visiune ruce de ‘nu
paravisu
ca forse priestu, si ‘u ‘nse stani attientu,
scumpare tutta… vinta da lu vientu.
E’ brutta, invece, a ‘cchine ‘ccu ‘e valice
aspetta ‘ppe pigliare l’autobussu
pecchiri ‘a vita a iddru restinata
nunn’à ‘cchjù ‘ppe scenariu ‘ssu paise
ch’era lu veru e sulu paravisu.
‘Ntra l’uocchj chjìni ‘e lacrime i scaluni
nu’ ‘nsù scaluni, no!, nu’ ‘nsù scaluni
ma muri ranni e gruossi addrue arrieti
‘cc’ eni l’amure senza chjaru ‘e luna.
‘Cc’è ‘na guagliuna cà, ‘ccu ‘e manu a ‘u core,
vasannulu à griratu “ ’U’ ‘nte scordare
de chiru ca mò sienti ‘ntra lu piettu;
te vuogliu tantu bene… torna ancora…
…t’aspiettu… torna ancora ca t’aspiettu!…”
<- - - - Lista
|
