|
De sira, quannu ‘ncielu i stiddrj lucenu
e ‘a ‘u core ‘e tutti griranu ca è astate,
versu ‘u Puzziddru quante caminate
ne simu fatte
e quante e quante ancora ni ‘nne facimu
all’aria frisca, sapurusa ‘e pinu
ca ‘u venticietru porta da luntanu!
‘Ppe vivere chir’acqua de ‘a funtana,
ca curre iurnu e notte da tant’anni,
facimu a fila ca,
‘ppe viecchju rittu,
eni acqua beneritta;
fa bene a ‘a
trjppa e, iu ‘cce accucchju, “a ‘u core”
pecchì ‘ntra ‘u munnu posti cumu chissu
nun’ ‘nci ‘nne sunu tanti ‘ppe fa l’amure.
E’ quatrareddre nostre già lu sanu
ca scialamientu ‘e core miegliu ‘u’ ‘nc’eni
de vivere ‘na picca, chjanu chjanu,
‘ccu ‘a manu de ‘u guagliune ‘ntra la manu.
Chissu è ‘u Puzziddru:
acqua frisca e amure
a tutte l’ure! …
<- - - - Lista
|
