|
Doppu ‘a frissura, ‘a ‘ntinna e ‘a
cursa ‘e i ciucci,
c’anu scialatu tantu ‘u core ‘e tutti,
pue se ‘ncomincia n’atru ‘e ‘ bietrj iuochi
ca se su priparati ‘ppe ‘ssa festa.
Sunu ‘e pignate!… ‘E ‘nu barcune a n’ atru
se liga, ‘mmienzu ‘a chjazza ‘na cordeddra
àvvuta, sini e noni, ‘nu ‘ttrj’ metri
addrue ‘cce su ligati, a vucculiddra,
‘nu nove o dece viecchj pignatietrj.
A ‘u iocature ca s’è prisentatu
se gnecanu strjnti l’uocchj e pue, de ‘mpressa,
si ‘cce fànu fare ‘na settina ‘e giri
ca rescienu a ‘u ‘mbriacare ‘ccussì ‘ttantu
ca a ‘a fine ‘u’ ‘nsape addr’eni e addr’ani ‘e jìre.
Si ‘cce runa ‘nu luongu palu ‘ntra le manu
e, ‘ntra li griri ‘e i gienti ca ‘u cunsiglianu
“Vate ‘cchjù arrieti… nò… ‘cchjù avanti … tira…”,
‘cchjù ca vattire, prega a manu iunte,
de tirare ‘na palata a ‘na pignata
c’ un ‘nfuossi chjìna ‘e cinnera e farina
o ‘e ‘ncunu strazzu ‘mpusu ‘e squaratina.
Rirenu i gienti e griranu “…tira ‘e zinna…”
chiri d’arrieti ‘mmuttanu ‘cchjù avanti…
‘u iocature vatte a ‘rriestru e a ‘mmanca
e, ‘u ‘cchjùi de ‘e vote, a ‘u postu de ‘a pignata
lu palu spizza ‘ncuna moddrarula
ca, a ‘vvote, manca picca ca nu’ ‘vvula.
<- - - - Lista
|
