|
‘Ssu nume cum’eni natu nu’ ‘nse sape!
Forse tant’anni
arrieti,
a ‘u tiempu de lu
viecchju Santu Pietru,
‘a via ca scinne versu ‘a jumara
quannu chjovìa, de
viernu, se ‘nzancava
e siccome ‘cc’era a ‘u fiancu ‘na barracca
i gienti de ‘u paise, ‘ppe ‘u’ sbagliare,
‘a caseddra ‘e ‘u pantanu, fonta ‘e zanca,
solìanu chissu postu numinare.
Ma forse ‘u fattu è iutu de ‘ccussini:
Sempe tant’anni arrieti,
a ‘u tiempu de lu
viecchju Santu Pietru,
campava, cumu tannu se campava,
‘n’uomine ca ‘ppe nume avìa Pantanu
e ch’era lu patrune ‘e ‘na caseddra
addrue vivìa, cuntientu,
‘ccu ‘a cumpagnìa ‘e ‘nu puorcu e ‘na ciarveddra;
‘ccussì “ ‘a caseddra ‘e Pantanu”, ugne persuna,
ani chjamatu ‘u postu ‘ccu ‘ssu nume.
Peccatu ca nu’ ‘nc’è nuddru de i paisani
ca me sapissi rire, cittu cittu,
“’Cchi ‘vvà cuntannu, Rà, nu’ ‘nci’à chjavatu,
ii fatti nu’ ‘nsùnu iuti cumu à rittu…
quannu è successu iu eru già natu
e mò te cuntu cumu sunu stati…”
<- - - - Lista
|
