|
‘U bruttu de i paisi muntagnusi
eni ‘a mancanza forte de lu mare
ma a tuttu ‘cc’ è rimeriu e, a Santu Pietru,
‘cci’ à pruvvirutu
l’acqua de ‘a jumara.
Quannu lu sule spacca puru ‘e petre
e ‘ntra ‘u paise se more
de surure,
tutti li quararietrj vanu a ‘u lunsu
‘ppe fare ‘u bagnu e ‘a peddre scura scura.
‘Cc’è chine sta curcatu a vucculuni…
‘ncun’atru… pensa sulu a le guagliune…
‘cc’è sempe chine canta e ‘ntreccia iungi…
e chine circa ielendrj o ranunghj…
L’acqua è ‘nu vruoru… vruscjanu i cuticchj…
è l’ura ‘e fare i tuffi a capusutta…
si ‘u’ ‘vvue… vieni tiratu ‘ppe le ricchje…
si ‘u fai… te pue trovare ‘a capu rutta…
Pue quannu, a ‘u tardu, ‘u sule ‘u’ basta ‘cchjùi
‘ppe ‘rrare a ‘a tintareddra atrj coluri,
ugne unu se ricoglie a ‘a casa sua
‘ccu i spaddrj chjìni ‘e ‘mpuddre e… de doluri.
<- - - - Lista
|
