|
Sonava ‘a campaneddra de bon’ura
e tutte le persune de ‘u paise,
‘ccu ‘ncapu i cuofini, e ‘e cardarelle supa ‘e spadre,
currianu a aiutare i muraturi
portannu supa ‘a Rota da luntanu
rina e petruni ‘e jume ‘ppe li muri.
Le quatrareddre tutte e i quatrarietrj
facìanu a gara a ‘cchine, ‘ntra chir’ure’
carriàva roba ‘e ‘cchjùi e ntra lu core
vivianu ‘na cuntentizza mai provata
pecchì, ‘ntra i canti e i iuochi de ‘u lavuru,
tutti sapianu ca se fravicava
‘na nova e ranne casa de ‘u Segnure.
‘E manu se unghjavanu ‘ppe i caddrj,
tant’atre vote, invece, se rumpìanu
ma i doluri chine le ‘ssentìa?
‘Nu strazzu de cammisa ‘mmuolicatu
e pue, cumu si nente fuossi statu,
a ‘u fiancu de la mamma e
de lu patre
se jìa de ‘mpere a carriare petre.
Moni, ‘e tant’anni, supa Santu Pietru,
s’aza ‘na Ghjesa ch’eni la ‘cchjù ranne
de tutte chire ‘e chista e chiddra banna.
Ne avimu tutti quanti ‘e ringraziare
a chine ugne matina e senza nente
eni currutu a spànnere i sururi
sulu ‘ppe onure ‘e Diu e de ‘u paise;
ne avimu tutti quanti ‘e ringraziare
i viecchj e i giuvinietrj santipetrjsi.
<- - - - Lista
|
