|
Dicitime ‘cchir’è c’u’ ‘nsanu fare
i gienti arsusi d’essere ‘mmiriati;
‘nquattru e quattr’uottu, senza ‘cce pensare,
puru l’idee ‘cchjù ciote e strambalate
piaglianu cuorpu e vita a ‘nnu momentu,
custassi pocu o nu’ ‘ncustassi nente.
Mò chiru ca mancava a Santu Pietru
‘ppe ‘u mintere a lu paru
de Sarremu
era ‘nu festivallu ca, si bietru,
potìa grirare ‘a ‘u munnu: “Sente e trema!”
Da ‘u iurnu ch’eni nata ‘ssa gulìa
‘cchjù ‘nu’ ‘nc’ è stata atr’occupazione;
a tutte l’ure, ‘ntra ‘u liettu o ‘ppe la via,
chine fà gargarismi e chi canzune.
Quannu vene ‘u ranne iurnu, finarmente,
tuttu ‘u paise è ‘nu vurvinu ‘e gienti.
Spierti i cantanti, beddre le canzune,
i sonaturi diegni de la
Scala…
è ‘nu successu, sì, ‘nu successune
e ‘u core ‘e tutti quanti si ‘nne à sciala.
Pue, quannu è finitu tuttu e ugne unu pensa
a ‘u tiempu e ai sforzi ca ‘cce sù voluti
si ‘cc’ eni ‘ncunu ca pue si ’nne pente
certu ‘u’ ‘ddru fani pecchiri ‘unn’ à gorutu.
<- - - - Lista
|
